பேரறிஞர் அண்ணாவின் 57வது நினைவு நாள் – அமைதி ஊர்வலத்தில் வைகோ பங்கேற்பு
தமிழ்த் தாயின் தலைமகன் பேரறிஞர் அண்ணா அவர்களின் 57ஆவது நினைவு நாளையொட்டி, 03.02.2026 அன்று சென்னையில் நடைபெற்ற அமைதி ஊர்வலத்தில் மறுமலர்ச்சி திராவிட முன்னேற்றக் கழகத்தின் பொதுச் செயலாளர் வைகோ அவர்கள் பங்கேற்று மலர் தூவி மரியாதை செலுத்தினார்.
அண்ணாவின் தமிழ்மொழி பற்றும், சமூக நீதி, மாநில சுயாட்சி, கூட்டாட்சித் தத்துவம் ஆகியவற்றுக்கான அர்ப்பணிப்பும் இன்றளவும் தமிழக அரசியலுக்கு வழிகாட்டியாக விளங்குகின்றன என்று வைகோ குறிப்பிட்டார். அண்ணாவின் சிந்தனைகள் எதிர்கால தலைமுறைக்கும் பாதுகாக்கப்பட வேண்டும் என்றும் அவர் வலியுறுத்தினார்.
இந்த அமைதி ஊர்வலத்தில் கழக நிர்வாகிகள், தொண்டர்கள் மற்றும் அண்ணாவின் மீது பேரன்பு கொண்ட பலரும் திரளாக கலந்துகொண்டனர். தமிழகத்தின் நவீன வளர்ச்சிக்கு அடித்தளமிட்ட மகத்தான தலைவருக்கு மரியாதை செலுத்தும் வகையில் வைகோ அவர்கள் ஊர்வலத்தில் நடந்து சென்றார்.